بالعامية لأول مرة

إعتدت أن تحرك اللغة العربية  أحاسيسي و إنفعالاتي بما تحمله من بلاغة وفصاحة وقدرة على التدقيق و والوصف و لرصيدها الراقي الذي حملته عبر التاريخ من نقل للإسلام و علومه و علوم الدنيا بأفرعها المختلفة ..و لذلك إعتدت منذ كنت صغيرا على الكتابة بالفصحى ..  … لكن في حالتنا هذه تكون لنا وقفة … فالحديث حديث الحرب الأهلية و الفتنة في بدايتها.. نحن نعيش فى مجتمع الشوارع و السلاح و المطاوى و السنج و الشوم و هذا لا يسير مع الفصاحة بقضيب واحد …. و مدام حديثنا حديث الشارع .. عذرا لغتي الجميلة لوهلة أتحدث بلهجتي العادية من أمام الكشك في الشارع … نديها بالعامي…. و سمعني لما عم الحاج يعدي ……..

بسم الله نبدأ :

 العيال بتوع الإخوان و من يتناقشون من مؤيدين الإعلان الدستوري ماشيين ورا إن أي حد إعترض على حاجة في الإعلان يبقى تبع الزند و النائب العام …. بيبنوا كلامهم على إفتراض كامل لوجهة نظر اللي قدامه من غير ما يسمع … يعني واحد زيي موافق على إقالة النائب العام و إعادة المحاكمات … بس مش موافق على تحصين القرارات ولا اللجنة التأسيسية و حقي أظن إني لا أوافق و من حقي لا أثق في الإخوان لأنهم موفوش بعهد فعلا .. و قالوا علينا بلطجية لما كنا في محمد محمود لما كانوا مستنيين البرلمان بتاع أخونا الككتاتني و عصام العريان …. أول إمبارح كنت بتكلم مع واحد فبيقول إن تحصين القرارات علشان يحمي قرار عزل النائب العام و فضلت مقتنع إنه ممكن يحمي قرار واحد مش كل قراراته … و فعلا طلع إمبارح وزير العدل و قال ينفع يحصن قوانين دون قوانين … يعني لا مؤاخذة الموضوع بمزاجه ….. و النبي يا إخوانجي لما تحب تتناقش إعرف رأي اللي قدامك برضه قبل ما تتناقش جايز تطلع فردة نايمة زي المرشد اللي سايقك ….

و ده برضه لازم يلحق بيه إن البرادعي و حمدين متدنيين و الحركة اللي عملوها دي ماتعديش تماما …… موصلتش للفلول يا إخوانا ….. و أخونا البرادعي بتاع بيانات أمريكا و الإتحاد الأوروبي برضه دماغه هبت و شيست.

أخيرا بقى علشان متناقش تاني ف حاجة و ده بقى عن الحرب الأهلية : في أوروبا و الدول المتقدمة :):) لما بييجوا يصدروا قرار سياسي ثقيل كده بيجيبوا تقريرات أمنية عن  إحتمالات ردود فعل الشارع قبل ما يعلنوا القرار علشان لو حصلت مصيبة يعرفوا يلحقوها و طبعا ده محصلش عندنا …. مفيش حد من مستشارين مرسي شاف الإعلان ولا عرف عنه حاجة و لا وزير العدل (اللي الإخوانجية بيثقوا فيه ) شافه قبل كده بل بالعكس كلهم طلعوا نقدوه …… هل يا سيدي القرارات تؤخذ بهذا الشكل ؟؟؟؟؟!!  فين بقى الشرطة و الجيش اللي بيدعكونا في كل مظاهرة و إعتصام … ميعرفوش يفضوا “خناقة” ؟؟؟ سؤال بقى جنب مسئولية ردود فعل الإعلان اللي يشيلها مرسي و القوى المدنية … فين مسؤولية تأمين الناس في الشارع ؟؟ مش دي مسؤولية السلطة التنفيذية اللي على رأسها مرسي و القنديل بتاعه ؟؟؟ ليهم نصيب في الدم.

حل بقى الحرب الأهلية يا مرسي ….. و مع العلم أنا من بتوع الشعب يريد تطهير القضاء و تطهير الداخلية …….. و الحكم العادل الرشيد … و الخطة الواضحة العملية … و الإدارة السليمة القائمة على العلم ……. كل دول إنت معندكش خطة لواحدة فيهم 🙂

 أفكركم بس إن الإخوان لما إفتكسوا في تعديل الدستور أظن شفنا ثمار عمل صبحي صالح و من شابهه في المواد المعدلة لإستفتاء 19 مارس و الإفتكاسة التانية الإعلان الدستوري اللي حطلك مطلب و لا إتنين ثوريين مع مكاسب شخصية ؟؟ أظن أن الإخوان من فترة كدهو ظهرت أوي في 2009 إنهم نفسهم يحتاجون إلى التطهير … يطهروا نفسهم الأول و بعدين يطهروا القضاء ……..

 البلد كبيرة أوي على مكتب الإرشاد … و لو هتقول لي إن مرسي الرئيس لوحده ( طب مين اللي أعد الإعلان الدستوري  ؟؟؟؟؟؟؟؟؟؟ :):) راح لمرتضى منصور يكتبهوله في المكتب ؟؟؟؟

يبقى اللي مؤيد للإعلان كله أنا أشوفه غلط ,بالذات لو فكرته إن الحلو اللي في الإعلان أحسن من الوحش ( و دول طبعا مش شباب الإخوان ) لأن دول بالذات الإعلان لو كان فيه أغنية للست كان هيعجبهم … و اللي ضد الإعلان كله يبقى برضه بيستهبل و بيمثل و خلاص …. و الخلاصة عندي أن الثورة قامت علشان أعمل الحاجة الحلوة مش إني أقبل الإعلان الدستوري لأن الحلو فيه أكتر من الوحش …. معلش أنا أسف منطق السم و العسل ده بلاش منه … أنا عايز العسل بس ….. حقي بعد الثورة أخد الحاجة الحلوة بس ……. خلاصة … كلنا رجعيين أيها السادة ……. و أظن التاريخ يعيد نفسه  بس الفرق إن عبد الناصر لما عملها الشعب وقف معاه … و لما مرسي عملها الإخوان عملوا فيها الشعب ووقفوله قدام القصر ……… و محدش عارف إيه جاي قدام

 الله يرحمك يا إسلام …. الله يرحمك يا جيكا …. الله يرحمنا كلنا و كل الغلابة اللي مش فارق معاها السياسة و فارق معاها تعيش بالحلال بنظافة…

سيدي الفاضل … كل سنة و إنت طيب … و المرة دي مش تهريج … المرة دي بجد ( مصر بتتحرق )

عمرو يحيى.

Advertisements

Say something

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: